Նշավանի Ս.Կարապետ կառուցվող եկեղեցին գտնվում է ՀՀ Արարատի մարզի Նշավան գյուղում: Հիմնարկեքը կատարվել է 4.06.2015թ ձեռամբ Արարատյան Հայրապետական թեմի Առաջնորդական Փոխանորդ Տ.Նավասարդ արքեպիսկոպոս Կճոյանի:

Այս գյուղի ժողովրդի հիմնական մասը Վեդու շրջանի Մորուտ(Զնջռլու) գյուղի ժողովուրդն է 20-րդ դարի առաջին կեսին տեղափոխված Նշավան, նրանք բոլորը չափազանց կապված են իրենց պապենական սրբավայրի Ս.Կարապետ վանքի հետ, որը գտնվում է Մորուտ(Զնջռլու) գյուղատեղիի հարևանությամբ: Երբ այս գյուղում քննարկվում էր կառուցվելիք եկեղեցու անվան հարցը, այստեղ էլ այս էր խնդիր դառնում, գյուղացիների մեծամասնությունը «Ս.Կարապետ» անվանն էին համաձայն, ես առաջարկում էի Ս.Գրիգոր Տաթևացի, որովհետև այս գյուղում աղանդավորական մի խումբ բավական արմատակալած էր և Ս.Եկեղեցին բավական դժվարություններ պիտի հաղթահարի ժողովրդի միջից աղանդավորական շփոթը վերացնելու համար: Հիմքը լցրեցինք 2014թ-ին հիմնարկեքը օրերի մեջ ձգձգվում էր ամենատարբեր պատճառներով, ի վերջո Աստծո նախախնամությամբ  2015թ հունիսի 4-ին Ս.Հովհաննես Կարապետի և Աթանագինես եպիսկոպոսի տոնի օրը(որը ըստ էության Ս.Կարապետի Գյուտ նշխարաց է հայոց ազգի համար) կատարվեց հիմնարկեքը և քննարկումը դադարեց եկեղեցու անունը օրվա շնորհն էր̀ Ս.Կարապետ: Չմոռանամ նշել, որ այդ տարածքում տասնամյակներ առաջ կառուցվել էր անհայտ զինվորի արձանը, ինչպես Խորհրդային ժամանակվա գրեթե բոլոր բնակավայրերում, սակայն Նշավանի արձանը մի տարբերություն ուներ արձանի գլխավերևում տեղադրվել էր Խաչ: Խաչը տեղադրողի որդին էլ հենց նվիրաբերեց հարակից տարածքը ամբողջ գիշեր մտատանջությունից և Աստծո կամքի առաջ կամավոր խոնարհվելուց հետո: Զարմանալի էր բայց փաստ, ոչ նախկին անաստված միջավայրը, ոչ աղանդավորական հակաեկեղեցական քարոզչամեքենան չկարողացավ դույզն ինչ վնասել ժողովրդի ոգևորությունը, եկեղեցին հիմնադրվեց մեծ ոգևորությամբ և գրեթե ամբողջ գյուղի ջանքերով, բացառությամբ փոքրաթիվ աղանդավորների:

 

 

                           Նշավանի այցելու հովիվ Տ.Ղազար քահանա Պետրոսյան