Արարատյան Հայրապետական թեմի <<Ապաշխարենք Կառուցելով>> եկեղեցաշինական ծրագիր
<<Երեսդ մրի, գումար հավաքի, իմ տունը կառուցի>> տեսիլք Ս. Գրիգոր Լուսավորիչ
Ծրագրի հիմնադիր և պատասխանատու Տ.Ղազար քահանա Պետրոսյան
(Հոգևոր հովիվ Բյուրավանի Ս. Գրիգոր Լուսավորիչ Եկեղեցու, ԱՀԹ, ՀԱԵ)
Արարատյան Հայրապետական Թեմի «Ապաշխարենք կառուցելով» եկեղեցաշինական ծրագիրը հիմնվել է մեկ նպատակով. աջակցել ՀՀ համայնքներին ունենալու Ս.Եկեղեցի: Հաշվի առնելով այն հանգամանքը, որ խորհրդային տարիներին քանդվեցին և ավերվեցին մի քանի հազար եկեղեցիներ ու վանքեր և այս ամենը ուրացած հայերի ձեռքով, ինչպես Ս.Գրիգոր Լուսավորիչը իր տեսիլքի մեջ տեսավ, որ գառները ետ գետի մեջ էին ընկնում և հակառակ կողմից դուրս էին գալիս իբրև թուխ գայլեր և հարձակվում էին գառների վրա. “և արյան ճապաղիք եղավ”(Ագաթանգեղոս): Գայլերի դատաստանը Աստված կտեսնի, գառների վարձքը Աստված կտա, սակայն գայլերի քանդած եկեղեցիները մեր համազգային խայտառակությունն է. հայ մարդը դարերի հոլովույթում միայն կառուցել և երբեք չէր քանդել Ս.Եկեղեցին, սակայն ազգովի մեծ մեղքի մեջ ընկանք ու վերականգնելը և դրանով ներկայումս ապաշխարելը մեր սերունդի պարտականությունն է: Այս ծրագիրը կոչված է. «հայ գյուղում անպայման պետք է լինի բարեկարգ և գործող Եկեղեցի», նպատակի իրագործմանը: Ամենուրեք հոգևոր զարդոնք է, բոլոր համայնքներն էլ փափագում են ունենալ եկեղեցի, սակայն կազմակերպող, աջակցող, խորհուրդ, նախագիծ և նախահաշվարկ տվող կառույցներ գրեթե չկան: Այս ծրագրի նպատակն է օգնել և առիթ տալ հայ մարդուն եկեղեցի կառուցող դառնալու, սեփական լուման ունենալու Աստվածային այս վեհ գործում, որով Աստծո օրհնանքին կարժանանա ինքը և իր ընտանիքը: Մենք ակնկալում ենք բազմաթիվ մարդկանց մասնակցությունը, եթե մարդ միլիոնատեր չէ դա չի նշանակում որ պիտի զուրկ մնա եկեղեցի կառուցողի վեհ զգացողությունն ունենալուց: Քրիստոս կանգնած էր գանձանակի դիմաց և ամենաշատը տվողի գնահատանքին արժանացավ այրի կինը իր մեկ գռոշով: Ուստի արհամարհելի չէ ոչ մի լումա, գնահատողը Աստած Ինքն է: Ամեն գյուղում կառուցելով կամ վերանորոգելով Ս.Եկեղեցին պետք է հայ ժողովրդի ապաշխարությունն իրագործել և դրանով մեր ազգի թիկունքը(հոգևոր միաբանություն և միաբան հավատք) ամրացնել ̀ Մայր Հայաստանը պետք է վերստին ծաղկի իր Սուրբ Եկեղեցիներով ժողովրդին վերադարձնելով իր Հայ քրիստոնյա առաքինի կերպարին: Մեր երկիր այցելողը հաղորդվել է, և պետք է հաղորդվի Ս. Հավատքին, սովորի առաքինության ճանապարհը, և ոչ թե գա իր կրքերը բավարարելու, դրամի դիմաց պղծի մեր երկիրն ու միջավայրը: Մեր երկրից մեկնող հայը իր հետ պետք է տանի Սուրբ Հավատք և սրբության կենցաղավարություն, դառնա սրբության ուսուցիչ բոլոր ազգերին, այն ժամանակ պատվով և լիաթոք պիտի ներկայանանք իբրև առաջին Քրիստոնեա ժողովուրդ̀ պատմականորեն և այսօր մեր կենցաղով: Այս պահին սկսել ենք կառուցել 4 և վերանորոգել 1 եկեղեցիներ Արարատի մարզի Հովտաշեն, Ջրաշեն, Բարձրաշեն Նշավան և Վոստան գյուղերում: Ամենուրեք մեզ հարցնում են ինչպես պետք է կառուցեք 4 եկեղեցի, պատասխանում ենք Աստծո զորությամբ, մեր ժողովրդի հավատքով և նվիրվածությամբ. սա Հայոց ազգն է. աստվածապաշտ, Նոր Ուխտի ընտրյալ ազգը, առաջին քրիստոնյա ժողովուրդը, Քրիստոսի անվան փառքի համար նահատակված մի ժողովուրդ, տանջված ու խոնարհ մի ժողովուրդ: Այս ժողովուրդը պետք է հաստատվի իր դարավոր և Աստվածապարգև սուրբ առաքելության մեջ իբրև Սուրբ Հավատքի ջահակիր ազգ: Առաջիկայում նախատեսում ենք ևս երկու եկեղեցու կառուցումը սկսել, սրանով «Ապաշխարենք կառուցելով» ծրագրի նախնական փուլը մեկնարկած կհամարենք: Աստված թող հաջողի «Ապաշխարենք կառուցելով» եկեղեցաշինական ծրագիրը հայոց համայնքներում, և իր գոյության ընթացքին լուծի 365 եկեղեցիների կառուցման խնդիր. Ամեն: Տ.Ղազար քահանա Պետրոսյան