Հովտաշենի Ս.Բարթուղիմեոս կառուցվող եկեղեցին գտնվում է ՀՀ Արարատի մարզում Հովտաշեն գյուղում:
Հիմնադրվել է 2012թ-ին: Իբրև այցելու հովիվ միշտ զգացել եմ Սուրբ Եկեղեցու անհրաժեշտությունը, սակայն տրամաբանորեն ոչ մի ելք, ոչ մի հնարավորություն գյուղում եկեղեցի կառուցելու չկար, աղքատ գյուղ, դժվար կենցաղ: Այս բավարար չէր դեռ աղանդավորները ուզում էին գյուղի կենտրոնի հողը գնել և աղանդավորական որջ կառուցել, մերժվելով գյուղապետից, հողամաս են գնում գյուղի ծայրամասում և կառուցում շենք և բավական ոգևորվում: Նեղսրտած ես ̀ քահանան և գյուղապետը որոշում ենք կառուցել եկեղեցի, բայց նախագիծ, նախահաշվարկ…: 2011թ Ս.Ղևոդյանց քահանաների տոնին Մայր Աթոռ Ս.Էջմիածնում քահանայից ժողովի ժամանակ Ամենայն Հայոց Կաթողիկոսին հարց եմ տալիս խնդրելով գյուղերում կառուցվելու հարմար մի տիպային նախագիծ և նախահաշվարկ տրվի մեզ որպեսզի իմանանք կառուցելիքներս ինչ պետք է լինի: Վեհափառ Հայրապետը նախագիծ չտվեց, քաջատեղյակ գյուղական խնդիրներին, մեր կատարելիք գործի դժվարություններին խորհուրդ տվեց և այդ խորհուրդով էլ կարծեք օրհնեց մեզ համարձակ գործելու` գյուղի ամենալավ վարպետին կանչեք ձեր հնարավորությունների առավելագույնի չափով կառուցեք: Հավատալով Ամենակարող Աստծուն, ոգևորված Կաթողիկոսի խոսքից 2012թ-ին սկսեցինք կառուցել մեր ծրագրած անդրանիկ եկեղեցին, որի անունը հետաքրքիր մի տրամաբանությամբ տրվեց Աստծուց. Մասիս քաղաքում կառուցվել էր Ս.Թադեոս եկեղեցին, ուրեմն անմիջապես հաջորդ(կենտրոնական ճանապարհի վրա Երևանից դեպի Խոր Վիրապ Մասիսից հետո հաջորդ բնակավայրը Հովտաշենն է) հաջորդ բնակավայրում պետք է լիներ Ս.Բարթուղիմեոս եկեղեցին, որպեսզի Երևանից Խոր Վիրապ մեկնող ուխտավորը մինչ Գրիգոր Լուսավորչին հասնելը տեսնի և խոնարհվի Ս.Թադեոս և Ս.Բարթուղիմեոս եկեղեցիները որոնցով և առաքյալների քարոզչության պատմությանը, նոր ապա ժամանի Խոր Վիրապ` Ս.Գրիգոր Լուսավորիչ: Բացի սա Ս.Թադեոս և Ս.Բարթուղիմեոս առաքյալները իրենց քարոզչական ճամփորդության ընթացքին մեկ անգամ հանդիպել են իրար Արարատյան դաշտավայրում՝ ուրեմն իրենց անուններով եկեղեցիներն էլ իրար հանդիպակաց բնակավայրերում պետք է կառուցվեր Արարատյան դաշտավայրում:
Մեծ եռանդով սկսեցինք շինարարությունը և ամեն անգամ մեզ զարմացրեց, ուրախացրեց և խանդավառեց հավատավոր մարդկանց անշահախնդիր և սրտանց մասնակցությունը: Կամավորաբար գործի մեջ ներգրավվեց մի երիտասարդ ճարտարապետ՝ Արան և մեզ նվիրեց կառուցելու նախաշավիղ նկարը իր կողմից գծված: Ամենակարող Տիրոջը խնդրում եմ, որ օրհնի բոլոր Իր գործին ծառայողներին:
Հովտաշենի այցելու հովիվ Տ.Ղազար քահանա Պետրոսյան