Ինչ որ դուք խոսեցիք այստեղ, այդ խոսքերի հետևում կան օրեր, տառապանքներ, մի խոսքով լիարժեք գործեր և ապրումներ, որովհետև այդ բոլորը ձեր սրտի և մտքի միջով է անցել, ձեզ համար եղել է օրվա խորհուրդ, ինչը որ Տեր Ղազարը բերել է դեռ Ղևոնդյանց տոնից, այն հարց ու պատասխանից Վեհափառի հետ և տարածել է իր համայնքներից ներս, ձեր սրտերում դարձել են գործ, առաքելություն: Այդ իսկ պատճառով այդ խոսքերը , որ աղջիկներն այստեղ հնչեցրեցին, դրանք ապրված խոսքեր են, արժեքավոր խոսքեր են, որոնք համարժեք ձև ու բովանդակություն ունեն: Այդ պահին ընդհանրանալով հիշեցի Արիսպագոս բլուրի վրա` Աթենքում, մարդկանց իմաստասիրական,իմաստունների և բարոյագետների այդ օջախում մի սքանչելի արտահայտություն <<Նա, այսինքն Անծանոթը, բնակվում է յուրաքանչյուրիս մեջ, այսինքն Աստված, Անծանոթը մեծատառով>>: Հիմա Աստված մեր մեջ է բնակվում միշտ, Էմանուելը` Տերը միշտ մեզ հետ է եղել, եթե մենք նայենք մեր հոգու մեջ, ինչպես դուք եք նայում, ով մասնակից է այս ծրագրին` <<Ապաշխարենք կառուցելով>> , ուրեմն դրա մեջ ապրում է Աստված, բայց ժամանակակից աշխարհում, և հետընթացին եթե նայենք, և ներկան նայենք, և մտովի պատկերացնենք նաև ապագան, կտեսնենք, որ Աստված միշտ եղել է մարդկանց հետ, բայց մարդիկ չեն եղել Աստծո հետ: Այսինքն այս առումով ես հոգեպես լրիվ բավարարված եմ, և կարող եմ այս հանդիպումը պարզապես կոչել ամենաանկեղծ և սրտառուչ խոսքերով` դեպի Աստված, դեպի Աստվածայինը:
Այն ինչի համար մենք այսօր հավաքվել ենք և այն միջոցը,որ հիմա կա կայք կոչվածը, պիտի ծառայի, որ ձեր հավատքի գործերը ավելի համախումբ և կազմակերպված լինեն, որպեսզի ձեր սրտի մեջ կառուցված եկեղեցիները հողի վրա վեր հառնեն և Աստծո տան մեջ կարողանանք հանրային խիղճ ձևավորել, Աստծո հետ հաղորդակցվել կենդանի կապով, և կատարել առավելագույնս Աստծո թելադրանքը` << Սիրեք զմիմյանս>>:
Ես շնորհավորում եմ ձեզ` ամենքիդ, այս աննախադեպ օրվա առթիվ: Երբ որ եկեղեցաշինությունը գալիս է ոչ թե անհատներից, այլ համայնքից, հանրությունից, վարից` ներքևից, եթե կարելի է առանց աղավաղելու ճիշտ հասկանալ, ժողովրդից, երբ որ մարդիկ ինքնաբուխ ձևով իրենց հոգևոր հովվի շուրջը համախմբված ուզում են ունենալ Աստծո տունը, աղոթքի տունը, հոգևոր տունը: Եվ ուզում են ,որ Աստծո լույսը վայելեն, որ ճառագի իրենց վրա Աստծո այդ ճառագայթները, որ առավել ևս քրիստոնեանան իրենք և այդ լույսը տարածեն, ինչպես մեր առաքյալները` Թադեոսն ու Բարթուղիմեոսը և մեր հավատքի հայր Սբ. Գրիգոր Լուսավորիչը:
Իսկ ինձ համար նաև հաճելի էր մասնավոր իմաստով, որ Տեր Ղազարները Սբ. Գրիգոր Լուսավորիչ եկեղեցում հերթով հովվել են, հիմա նախախնամությամբ դուք եք հովվում, այսինքն դուք երիցս օրհնված եք: Ուրեմն Բյուրավանի Սբ. Գրիգոր Լուսավորիչը նախախնամությամբ Տեր Ղազարների հովվական անդաստանն է: Կես կատակ, բայց և լուրջ կարող ենք սա ամրագրել,ինչը փաստերն են ասում:
Ես ողջունում եմ ձեզ ամենքիդ, Աստված ձեզ զորացնի,այս ներշնչանքներն անպակաս լինեն ձեզանից և հետզհետե նորանոր բարձունքների հասցնեն, որ ձեր սրտի ցանկությունը տարածական լինի և առաքելության անդաստանը` եկեղեցաշինությունը, թող պտղավորվի:
<< Երանի եկեղեցաշինողաց,պտղատուից և երախտավորաց >>:
Աստված օրհնի ձեզ և ձեր ընթացքը : Շնորհքը, սերը և խաղաղությունը թող լինի ձեզ հետ այսօր, վաղը և ընդմիշտ: